Anatoliki Orchestra - Ostau Dau País Marselhés

Venguèt un temps ont, d’Istanbul a Esmirna, de Salònica a Atenas, lei Cafè Aman e lei Meyhane ressonavan au ritme dei cants e dei musicas que mesclavan influéncias grègas, armènias, otomanas e balcanicas. Aquelei luecs de convivéncia e de partatge èran lo còr palpitant d’una cultura populara vibranta, ont se maridavan improvisacion vocala, poesia e melodies carregadas d’emocion.
Anatoliki Orchestra vos convida a un viatge dins aquel univèrs, per faire ressonar en cò nòstre l’arma d’aquelei musicas atemporalas. Entre nostalgia e festejairesa, venètz descobrir lo repertòri dau Cafè Aman e dei Meyhane, ont lo chant e lei sonoritats d’ièr trobèron resson dins lo present.
Biografias :
Shushan Kerovpyan es nascuda a París dins una familha de musicians e a banhat tre sa mai jove edat dins lei musicas tradicionalas armènias e de l’Orient Mejan. Son univèrs musicau es tanben fòrça influenciat per lo folk american, lo blues, la soul music, e per diferentas musicas tradicionalas e popularas d’America Latina, d’Euròpa dau Sud e dau mond mediterranèu. Jòga e canta dins lo Collectiu Medz Bazar (grop franco-armèno-turc), The Circle Orchestra (musica grèga), Akn Ensemble (còr liturgic armèni), Kerovpyan Ensemble (musica tradicionala armènia e trobadorenca), e participa a d’autrei projèctes e collaboracions, principalament en Grècia e en França.
Panagiotis Panagakis es nascut sus l’illa de Samos en Grècia e foguèt en contacte amb la musica tradicionala de son país tre sa mai jove edat. A 17 ans, comencèt d’estudiar l’oud e la lyra a Istambol en participant a de seminaris de musica. Es diplomat dau departament de musica tradicionala de l’Universitat de Ioannina, amb una especializacion en oud. Ailà, foguèt en contacte amb la musica classica otomana d’Istambol, la musica d’Asia Centrala e dau mond arab e la teoria dei makam turcs. A tanben estudiat lo chant classic au conservatòri de Samos. A collaborat amb de musicians grècs importants, a jogat dins de grops en Grècia, a Chipre e en Turquia, e a cantat sus de canals de television e ràdio nacionalas. Ensenha l’oud, lo chant e la teoria dei makam turcs. Es tanben membre dau Laïki Orchestra Samou, l’orquèstra populara e tradicionala de Samos, coma cantaire e oudista.
Giannis Anastasopoulos es nascut a Atenas e comencèt de jogar dau violon a l’edat de sièis ans. Pendent d’annadas, estudièt la musica classica e lo violon au conservatòri Filippos Nakas d’Atenas. Pendent lei dètz darrierei annadas, se consacra au repertòri tradicionau. Jòga professionalament amb de grops en Grècia, especialament dins la musica tradicionala de las illas e dau rèsta de Grècia, lo Rebetiko e lo Smyrneiko. A tanben participat a d’ensembles acompanhant d’espectacles de teatre d’ombra.
Ensenha lo violon ai joves e ai mens joves e fai partida dau Laïki Orchestra Samou, l’orquèstra populara e tradicionala de Samos, coma violonista.
Antigoni Pappou es nascuda a Atenas e son educacion musicala comencèt tre sa mai jove edat. Estudièt premier la teoria musicala e se familiarizèt amb la flabuta e lo piano. Après d’estudis en musica tradicionala a l’Universitat de Ioannina amb una especializacion en ney, aguèt l’astre d’èsser en contacte amb la musica dau Mediterranèu orientau, d’Asia Minora, lo repertòri classic otoman e lo repertòri tradicionau grèc. Participèt a de seminaris e seguiguèt de cors particulars amb de musicians grècs e turcs a Istambol. A tanben jogat dins d’orquèstras e grops que tocan de musicas grèga, turca, armènia, araba e d’autrei musicas de regions e repertòris similars.